Comments Add Comment
No ads found for this position

बजेटको पूर्व तयारी अघि बढ्यो

सबैले आगामी आर्थिक वर्षको बजेट तयारी कहाँ पुग्यो भनेर सोध्नु हुन्छ तर, हामीले बजेटको पूर्ण तयारी थालेकै छैनौ । बजेटको पूर्ण तयारी सरकारको नीति तथा कार्यक्रम आए पछि मात्र शुरु हुन्छ । किन भने सरकारको नीति तथा कार्यक्रममा आधारित भएर बजेट निर्माण हुन्छ ।

बजेटको पूर्व तयारीको क्रममा आगामी वर्षको लागि बजेटको सिलिङ मोटामोटी रुपमा निर्धारण भएको छ । त्यसैमा आधारित भएर सरकारको कार्यक्रम र आयोजना निर्धारण हुने छ । त्यसैगरी हामीले चालू आर्थिक वर्षको बजेट कार्यान्वयनको स्थिति पनि विश्लेषण गर्दै छौं ।

चालू आर्थिक वर्षको वजेट समृद्ध नेपाल सुखी नेपालीको दिर्घकालीन लक्ष्यको आधारशीला निर्माण गर्ने बजेट भएकोले यसमा रहेका महत्वपूर्ण कार्यक्रमहरु लामो समयसम्म निरन्तर रहने प्रकृतिका छन् ।

उदाहरणको लागि नागरिकलाई काम र रोजगारीमा आबद्ध गर्ने, सबैलाई सामाजिक सुरक्षाको दायरामा ल्याउने, सवैको लागि स्वास्थ्य वीमा, मौलिक हकको कार्यान्वयन आदि ।

अर्कोतर्फ नेपाल सरकारले हालै दीर्घकालीन सोच सहितको पन्ध्रौ पञ्चवर्षीय योजनाको आधारपत्र सार्वजनिक गरेको छ । आगामी वर्षको बजेट यो योजना कार्यान्वयनको पहिलो वर्ष हुने भएकोले त्यतातिर हाम्रो ध्यान केन्द्रीत भएको छ ।

डा. रामशरण खरेल

नेपाल कम्युनिष्ट पार्टीको चुनावी प्रतिबद्धताको कार्यान्वयनको स्थितिको विश्लेषण गरी पहिलो वर्षको वजेटमा समावेश गर्न नसकिएका विषयहरुलाई सम्बोधन गर्नेबारेमा पनि छलफल अघि बढेको छ ।

चालू आर्थिक वर्षलाई हामीले सुशासन, समृद्धि र वित्तीय संघीयता कार्यान्वयनको आधार वर्षको रुपमा लिएका छौं । हामीले राज्य रुपान्तरण र संघीयता कार्यान्वयनको लागि आवश्यक नीतिगत, संरचनागत र जनशक्ति व्यवस्थापन लगायतक विषयहरु टुंगो लगाएका छौं । आगामी दिनमा त्यसको जगमा उभिएर द्रुतगतिमा अघि बढ्ने तयारी पनि गरिरहेका छौं ।

उच्च आर्थिक वृद्धिको लागि ठूलो लगानीको आवश्यक हुन्छ । आन्तरिक स्रोतको परिचालनबाट मात्र उच्च आर्थिक वृद्धि हासिल हुन सक्दैन । तसर्थ, हामीले लगानीको नीतिगत, संरचनागत र कानूनी व्यवस्थामा सुधार गरी वाह्य लगानी आकर्षित हुने अनुकूल वातावरण बनाएका छौं । आगामी वर्ष लगानीको वातावरण थप अनुकूल बनाउँदै लगानी आकर्षित गर्ने तर्फ ध्यान दिनु पर्ने छ ।

त्यसैगरी, हामीले वित्तीय संघियताको कार्यान्वयन विश्वमै अनुकरणीय हुने गरी सरकार बनेको एक वर्षमा संस्थागत गर्न सकेका छांै । नागरिकलाई सेवा प्रवाह गर्ने र विकास कार्य अघि बढाउने विषयमा तीनै तहका सरकारहरुको समन्वयलाई अझ दरिलो बनाउँदै लैजान आवश्यक छ ।

यसको लागि तीनै तहका सरकारहरुको जिम्मेवारी, अधिकार क्षेत्र र साधन तथा स्रोतको उपयोगलाई अझ बढी वैज्ञानिक, पारदर्शी र व्यवहारिक बनाउँदै जानु आवश्यक छ ।

अर्थतन्त्रमा देखिएका विद्यमान चुनौतीहरु समाधानतर्फ पनि बजेटले ध्यान दिनु आवश्यक छ । बजेट टोली अर्थतन्त्रको विश्लेषण पनि गर्दै छ । हामीले विभिन्न सरोकारवाला निकाय, मन्त्रालय र विभिन्न संघ संस्था तथा विशिष्ट व्यक्तिहरुसँग पनि सुझाव लिइरहेका छौं ।

(खरेल अर्थ मन्त्रालयका  सल्लाहकार  हुन् ।)

यो खबर पढेर तपाईलाई कस्तो महसुस भयो ?

ट्रेन्डिङ

Advertisment